Ua faailoa i faamaumauga a le ofisa o numera faamaumauina a le Malo le maualualuga o le numera o tagata na asiasi mai i Samoa i le masina na tea nei o Me e 21,796.
Ua faailoa e le ofisa o numera faamaumauina o lea aofaiga o tagata malaga e fulisia ia i latou na faaaogaina tautua a kamupani vaalele ae o le Air New Zealand sa pito toatele i latou na malaga mai ai.
O Niu Sila sa pito toatele iai tagata na afea lo tatou atunuu ia Me e pei ona faamauina e 6,902, pito iai Ausetalia e 4,495.
O faamaumauga foi o tagata na malaga mai i le atunuu i le masina lava o Me o le toatele o tagata sa asiasi mai i aiga e 5,891 ae o i latou sa mafua ona afea Samoa ona o fono ma faiga faapisinisi e 1,397.
O le toatele o tagata sa malaga mai i lea masina sa faamautu i aiga ma fale totogi e 9,131 ae o i latou sa nonofo i faletalimalo e 5,511.
O le umi sa nonofo ai i Samoa o le fitu aso ma le 30 aso.
O taualumaga a le fono aoao faitulafono o loo faagasolo nei, ua faailoa ai e le Minisita o le pulega o tagata tafafao, o loo taumafai nei i se faiga e mafai ai ona iloa i faamaumauga o tagata e asiasi i le atunuu le numera tonu o tagata tulisi mai isi atunuu e tafafao mai i Samoa e ese mai i o tatou lava tagata e tafafao mai ona o piitaga ma sootaga tau aiga.
