Ua maitauina le siitia maualuga o le tau o pasese e malaga ai i le vaalele i totonu lava ia o Niu Sila ma na laga ai ni finagalo i le aso ananafi ua alagatatau ona maua sina faamama avega mo le atunuu femalagai. 

Ua lipotia i le Stuff i le aso ananafi le tau o pasese a le Ea Niu Sila ma ua faailoa finagalo o tagata o le tulaga lava ia o pisinisi i le taimi nei ua faigata foi ma ua siitia le tau o auaunaga ae o se tasi o vaega o loo valaau ai le toatele ina ia faaleleia o le faiga faatauvaga lea poo le competition i le va o vaalele, o i lea manatu le toatele ua vaivai tele ma faigata ai ona tau faaitiitia mai le tau o pasese. 

O le Jetstar o loo faaauau pea nai ana malaga i Niu Sila ae e le o iai se tulaga faatauvaga o iai mo le Ea Niu Sila.

I auaunaga i Niu Sila atoa ua atili faaitiitia mai malaga a le Jetstar e pei ona o latou folasia i le 2019 ma ua na o le Ea Niu Sila ai foi o loo faaauauina lea tautua.

E tele finagalo ua agai i le malo ina ia faia se faiga e tau tuuitiitia ai le tau o pasese mo faigamalaga i totonu lava o le atunuu.

O le tau o loo iai nei le malaga one way i totonu o Niu Sila e le i lalo ifo o le 3 selau Niu Sila, o nisi taimi e silia ma le 400 tala Niu Sila.