O le savalia ai nei o le aso lona tolu o le masina amata o lenei tausaga fou ua faapena ona faatau ai oloa tau suauu ma penisini i Samoa i ona tau fou ua faailoa e le tamaitai Minisita o Tupe le afioga Mulipola Anarosa Ale Molioo, lea ua sii ai le tau o le penisini mai le 3 tala 34 sene sa iai i le masina faaiu o le tausaga 2022, i le 3 tala 35 sene i le lita mo Ianuari o lenei tausaga 2023.
O le tau o le suauu kiso ma le kalasini mo le masina amata o lenei tausaga fou ua pa’ū teisi ma ua mafua lea e pei ona faailoa e le minisita o tupe, ona o le siitia o le tau o fesuiaiga o le tala Samoa i le tala Amerika lea ua faamauina i le 2 tesimale 5 pasene.
O le kiso sa 4 tala 16 sene i le lita ua faatau nei i le tau fou e 3 tala 96 sene i le lita. O le kalasini o lona tau ua iai nei ua 3 tala 49 sene i le lita pe a faatusa i le tau sa iai sa 3 tala 57 sene i le lita.
Faaalia e le tamaitai minisita o tupe talu ai popolega o atunuu i le ono pa’ū o le tamaoaiga o le lalolagi i le lumanai faatasi ai ma le faatonutonuina o le aofaiga o suauu e gaosia e le faalapotopotoga o loo pulea lea oloa le OPEC, o le mafuaaga lea o le fesuisuiai pea o tau o nei oloa, ma tulai mai ai i se tulaga lē mautonu i le fesili, poo fea e agai iai lenei tulaga i le lumanai.
