Search
Search

Siamupini le Ekalesia Katoliko i ‘Au a alii ae o le EFKS i ‘Au a tamaitai i le Church of Origin

E lei faigofie finauga sa iai ‘au taitasi a le taamilosaga o le Church of Origin i le Aso Toonai ua mavae.

O le finau ma le taumafai mai o ‘au taitasi na iloa ai le tulaga ese o lenei taamilosaga kirikiti i totonu o Aukilani.

O tama taaalo lelei uma i totonu o ekalesia eseese e fili mai ai tagata auā le tauaveina o le igoa o le lotu i totonu o lenei taamilosaga.

O le Aso Toonai sa vaevaeina ai ‘au a Alii i Pool e fā:

Pool A – EFKS Blue, PIPC, NAOG White

Pool B – Metotisi, Katoliko Blue, Penetekoso

Pool C – AOG, EFKS Red, Katoliko Red

Pool D – EFKAS, NAOG Blue, LDS

E luasefulu minute sa faataga e taaalo ai le ‘au tatā ma le ‘au e tetea i le 50 polo.

O le tausisi o ‘au taitasi faapea kapetegi i tulafono o le taaloga na vavevave ai le faagasoloina o taaloga i lea aso.

O le mae’a ai o taamilosaga a Pool taitasi na ofi mai ai loa i luga nisi o ‘au tailua auā sailiga o le Quarter Final.

O quarterfinals na taalo ai le EFKS Red ma le LDS, manumalo le EFKS Red, EFKAS faia’ina i le PIPC.

Metotisi manumalo i le EFKS Blue ma le Katoliko manumalo i le Penetekoso.

O le semi final na taaalo ai le EFKS Blue manumalo i le PIPC ae o le Metotisi na faia’ina i le Katoliko.

O le sailiga o le siamupini a alii na fai si faigata o lea taaloga ona sa tatā muamua le EFKS Blue ma maua a latou ‘ai e 70 i polo e 50.

Sa tuliina e le ekalesia Katoliko ‘ai a le EFKS e uma le taimi toe lima ‘ai o loo totoe ae lei mae’a foi polo o le taaloga.

Peitai o tulafono o le taamilosaga, ua uma le taimi ae o loo tatā le Katoliko o le ala lea na lafo ai loa le manumalo i le ekalesia Katoliko e manumalo i le taamilosaga o le Church of Origin i lenei tausaga.

Ma o se faaiuga na malilie uma iai kapetegi o ‘au e lua ina ua tuuina mai le faaiuga e le komiti o loo faafoeina nei taaloga.

O ‘au a tamaitai e lua Pool sa iai:

Pool A – EFKS, PIPC, NAOG

Pool B – Katoliko, Penetekoso, Metotisi.

Ina ua mae’a taaloga a Pool na sao mai ai loa i luga le ‘au a le EFKS i le semifinal lea sa manumalo ai loa i le Metotisi, o le Katoliko manumalo i le NAOG. 

O le sailiga siamupini na toe taalo malosi ai le ‘au a tamaitai EFKS i le toe puipuia o le latou siamupini e pei ona iai i le tausaga ua mavae, ma o lea sa latou toe sola ai foi ma le manumalo o taaloga a tamaitai i lenei tausaga.

Tala sili ona faitaulia

POLOKALAME A LEOLEO

Tala mai samoa

TALA FOU MAI SAMOA

SAMOA UPDATE

PODCAST

Listen on

FAATALATALANOAGA

Keep uptodate with Radio Samoa activity & promotion

* indicates required