E sese faamatalaga na faasalalau i luga o le upega tafailagi a le soifua maloloina e faatatau i le umi o le taimi e faatalitali ai i Emergency Department poo ED.
O faamaumauga nei ua lipotia ai ua sau i lalo le umi e faatali ai i le ED peitai e le o le tulaga lea o loo iai i le tele o falemai.
Na ta’ua ai e le minisita o le soifua maloloina Ayesha Verrall ananafi, o le asō e faasa’o ai.
Saunoa le minisita, na iai le sasi i le taimi na tuu ai i luga o le upega tafailagi lipoti i le masina o Ianuari, peitai e ui i lea faaletonu ae lei faapea na sese ai ma faamaumauga na oo atu ia te ia, o le laulau a fono ma le loaloa o i latou o loo faia faaiuga ona o lea lava na sa’o lipoti sa o latou tauaaoina.
O faamaumauga nei na toe tuu i lalo ananafi ma ua faatoese ai ma le Pule Sili o le matagaluega Margie Apa.
O se mataupu ua aliae ina ua laga mai e le sooupu o le vaega a le soifua maloloina a le National, Shane Reti.
O se faamalamalamaga foi ua faasese ai e le minisita ia Verrall ripoti a nisi o ofisa faasalalau o loo ta’ua ai o lea lava na faaaoga e le minisita faamaumauga sese nei i ana faaiuga.
