Ua saunoa le failautusi o le NATO le North Atlantic Treaty Organisation, Mark Rutte e faapea na te iloa ua matua’i lē fiafia Donald Trump i le tele o paaga a le NATO ona o le lē fesoasoani atu ia Amerika ma Isaraelu i le taua i Iran e pei ona ia mana’o ai.
O le faamatalaga lea ua faailoa e le alii failautusi ina ua mae’a le la fonotaga ma Trump i le aso ananafi.
Na ia faailoa i le CNN sa tatala faatalanoaga i le va o itu e lua ma aga’i sa’o foi i le autū ma o loo ia malamalama foi i le lē fiafia o Trump.
Ua ia ta’ua ua mae’a ona ia faailoa i le alii Peresetene o le tele o atunuu mai le Atu Europa sa fesoasoani i le tele o auala e aofia ai fetuuna’iga i tulaga tau femalagaa’iga aemaise nofoaga e faamautū iai gaioiga ma isi lava lagolago.
E le’i faia ane se tali a le alii failautusi ina ua fesiligia i se tali o le matāupu pe o le a aga’i ese Amerika mai le NATO.
I se pepa o faamatalaga sa faalauiloa mai i le asō ua faailoa ai e se vaega o ta’ita’i o le Atu Europa lo latou taliaina lelei o le folafolaga e faatatau i le 2 vaiaso ua taofia ai fetauiga i Sasa’e Tutotonu.
Puna o Faamatalaga: https://edition.cnn.com/2026/04/08/world/video/donald-trump-iran-nato-war-strike-hormuz-oil-lead-jake-tapper
