Ina ua mae’a le taamilosaga o le Ipu a le Pasefika lea na tauva ai le ‘au a le atunuu le Manuma ma le ‘au mai Iapani, na tapena ai e le Amepasa o Iapani SENTA Keisuke ma lona ofisa se faaafe mo le ‘au a Iapani ma Samoa e momoli aloaia ai lana faafetai i lo latou sao.
Saunoa Keisuke o se fiafiaga tele lea mo ia ua mafai ona auai le ‘au a Iapani i lenei taamilosaga.
“E lagona lava le fiafia talu mai le sefulu masina talu ai talu ona tatala femalagaa’iga faavaomalo i malaevaalele lea ua mafai ai ona auai le ‘au a Iapani i le taamilosaga lenei.”
“E ui ina lē tau lau o le faamoemoe i lenei taamilosaga ae o le tulaga i le atina’e o le taaloga lakapi i Iapani o se tulaga mataina lea i la’u vaai.
“O le a tulimatai pea le Ipu o le Lalolagi i Farani lea o loo loma nei e taaalo ai le ‘au a Samoa ma Iapani.”
Saunoa foi le Taitaifono a le Iuni Lakapi a Samoa, Susuga Tuilaepa Sailele Malielegaoi e tusa ai o le taumafaiga a ‘au e lua i le taamilosaga.
“E masani lava ona tele ‘ai a le ‘au a Samoa pe a taaalo ma le ‘au a Iapani ae o le taimi lenei e le o toe faatamala le ‘au malosi a Iapani.
“O le ata lea o le tulaga maualuga ua oo ai lenei ‘au matautia I soo se taamilosaga tele a le lakapi.
“O le mea lea e momoli atu ai le faafetai tele i le Malo o Iapani ona o le atina’eina o lenei taaloga i ona laufanua, e lē taumate o loo tapena ma silasila toto’a foi auā le Ipu a le Lalolagi i se masina o i luma.”
Na tuuina ai foi le avanoa i sui o ‘au e lua e tauaao atu ai nisi o meaalofa e faamanatu ai pea lenei faamoemoe.
