O le tausisia e le malo o Ausetalia o ta’iala o pulega lelei, ma manino ae avanoa ai ona mau tali atu ai i ona tagatānuu, ua faalauiloa ai e le sui o lea malo i Samoa poo le Komesina Maualuga le mae’a tapena ai o se fesoota’iga i luga o upega tafa’ilagi, e maua ai faamatalaga uma o fesoasoani a lea malo mo Samoa ma isi atunuu o le Pasefika.
E faitau miliona tupe o loo faaalu e Ausetalia i tausaga uma i ana fesoasoani mo le tatou atunuu i ona vaega eseese, ma o le tāua lea o le fesoota’iga ua tapenaina, o le maua ai o faamatalaga i le faaaogāina o ia tupe aemaise o polokalame o le atina’e o Samoa o loo faaaogā iai.
O le amataga o le vaiaso nei na faailoa aloa’ia ai lea tapenaga i se faatasiga sa auai le ta’ita’i o le tatou malo ma le sui o le malo o Ausetalia o loo galue i Samoa.
