O le fono tele a atunuu laiti o le Pasefika o le a talimalo ai Samoa i le faaiuga o le masina fou o Novema, agai atu i le masina faaiu o lenei tausaga, ua ave ai se feau tāua i atunuu e tatau ona tutu faatasi e momoli so latou leo malosi i le fono o sosoo ai nei a Malo o le lalolagi le COP 28 o le a toe talanoaina ai le mataupu ua laualuga nei i le lalolagi o suiga tetele o le tau.
O le fonotaga i Samoa o loo tapena iai le Malo ma le matagaluega o Puna’oa Faalenatura ma le siosiomaga o le a faamaopoopo ai manatu o atunuu laiti mo lana usugafono i le faatasiga a le lalolagi o sosoo ai nei, lea o le a toe iloilo ai iugafono na pasia i le fonotaga i Pale i Farani.
Ua faailoa i se pepa o faamatalaga faalauaitele mai le faalapotopotoga o le siosiomaga o le Pasefika le SPREP, e tāua le sao o atunuu laiti o le Pasefika e aofia ai ma Samoa i le tapenaina o se folasaga malosi e tuuina atu i luma o malo tetele ma malolosi o latou tamaoaiga.
Ina ia le gata ia latou talia le faaitiitia o kasa oona mai a latou falegaosi oloa o loo faaleagaina ai le ozone o le lalolagi ma mafua ai suiga o le tau ua fesootai i malaga faalenatura ua afaina ai tele atunuu laiti, ae ia latou lagolagoina le faamatuu atu o tupe e toe faaleleia ai tamaoaiga o atunuu laiti ua afaina ona o suiga o le tau.
