O le Aso Tofi nei i le 10 i le taeao o le a tuua ai e le vaa o le Lady Samoa IV le uafu i Apia mo lana malaga i Amerika Samoa, ma o le faato’a toe folau lea o le Sa o le faalapotopotoga o vaa a le atunuu mo lea malaga masani, ina ua taliu mai i se malaga togipau sa la’uina ai uta ma pasese mo le motu o Pukapuka ma Nassa i le Atu Kuki.
O le malaga i le vaiaso nei o le a ave ai uta ma faamomoli o le Kerisimasi mo aiga i Amerika Samoa ae o le a aumai ai foi i Samoa pe a toe taliu mai i Apia le Lady Samoa IV ma uta ma faamomoli o le Kerisimasi mo aiga i lo tatou atunuu.
O le vaiaso na tea nei e leai ni pasese ae sa na o uta na ave i Pago Pago sa faaaogā ai se tasi o vaa o le faalapotopotoga o vaa a Samoa ona sa malaga le Lady Samoa IV mo lana malaga togipau i le Atu Kuki.
O le faaiuga o le vaiaso o le a toe folau mai ai i Samoa le Lady Samoa IV ma uta ma faamomoli, o le a fetaui lelei foi ma le sauni atu o aiga i le faamanatuina o le Kerisimasi i le Aso Gafua o le vaiaso fou.
