O loo iai faamoemoega o le fonotaga ua feta’ua’ia nei e faatatau i le mataupu o le lafoaia o otaota faaniukilia ma le suavai palapala i le Vasa Pasefika, o le a soalaupule ai ma maua ai se tonu o lea mataupu.
I se faatalanoaga a le sui o le TEPCO poo le Tokyo Electric Power Company ma le leitio faavaomalo a Niu Sila ua faailoa ai o loo latou mananao e faailoa i le lalolagi o le fuafuaga e faamatuu ese le silia ma le 1.3 miliona tane o le radioactive wastewater lea i le Vasa Pasefika, o le a saogalemu.
O le malo o Iapani, le failautusi o le Pacific Islands Forum o Henry Puna ma le Palemia o le Atu Kuki Mark Brown lea o loo taitaifono i le Forum, ua fuafua o le a auai i le fonotaga lea e faia i Iapani.
Fai mai Puna o le fonotaga o loo tulituliloa ai le autasiga na iai i le PALM9 le fonotaga a taitai o atumotu Pasefika sa faia e malupuipuia ai o latou atunuu mai le faaleagaina i mea faaniukilia.
E tele taitai o le Pasefika ma saienitisi ua mae’a ona o latou faailoa ane e le o iai se faamaoniga faasaienisi e faamaonia ai o le a saogalemu lea gaioiga e ui o loo finau mai Iapani e saogalemu.
O le otaota lea o loo fia lafoai e mai le nofoaga o le Fukushima Daichi Nuclear Power Station lea na faaleagaina i le mafuie o le 2011 e 9.0 le malosi i le fua mafuie.
