O le afiafi o le Aso Tofi 17 o Aokuso i le 6 i le afiafi lea ua fuafua le Central Auckland Specialist School e tatala aloaia ai le isi vasega a le May Road School, e faapitoa mo fanau Samoa e iai o latou manaoga faapitoa.
O lea vasega e aoaoina ai fanau i gagana e lua, o le gagana Samoa faapea ma le gagana Peretania.
O se fuafuaga alualu mamao ua leva ona faataatia mai e le pulega a le aoga i le lua tausaga talu ai, ma le manatu maualuga e tatau ona oo i le tausaga lenei ua faatino lenei faamoemoe.
O loo valaaulia nisi o mātua ma pule aoga sa latou amataina le faavaeina o lenei aoga faatasi ai ma mātua Samoa.
O le autu foi o lea afiafi o le taumafai lea e faailoa atili atu i le komuniti a Samoa le vasega lea ua tatalaina mo tatou lava fanau.
O le amataga o le tausaga na amata ai loa le vasega lenei mo tamaiti aoga e toaono.
Ae o le talafaasolopito i lenei aoga, o le taimi muamua lenei ua tatala ai se vasega faapitoa e faaaogāina ai gagana e lua i totonu o Niu Sila.
Ma o le susuga ia Sueina Rian o loo gafa ma le aoaoina o nei fanau aoga faatasi ai ma le lagolagosua a nisi o faiaoga e toalua.
E 2 vasega o loo iai i totonu o le Central Auckland Special School, ae 33 tamaiti i le vasega e tasi.
Ma o le ala tonu lea ua faataoto ai le fuafuaga a le aoga mo se isi vasega e tatala mo fanau Samoa lava latou ona ua latou tilotilo ua toatele tamaiti, ae o le 23%o tamaiti aoga i totonu o le aoga o fanau aoga Samoa.
E lē o muta ai I’i taumafaiga a le Central Auckland Special School mo vasega e tatala i fanau Samoa, o loo iai pea lo latou naunautaiga e tatau ona tatala nisi vasega i nisi tausaga o i luma ona o loo maitauina pea le toatele o fanau Samoa o loo iai manaoga faapitoa e fia auai i le aoga.
