Ua sauni le asosi o foma’i a Samoa le Samoa Medical Association, e faatino i le amataga o le masina fou o Iulai se faiga fou o le a galulue ai mo le na o le 8 itula e amata i le 8 i le taeao ae manava i le 4 i le afiafi, ae le toe galulue i taimi o le po, ma faaiuga o le vaiaso e aofia ai le Aso Sa.
O le mafuaaga o lea faaiuga a le asosi o foma’i, ona ua teena e le komisi o galuega a le Malo le latou talosaga e ala i se fuafuaga poo se proposal mo se siitaga i o latou totogi faapea ma alauni.
Sa faatino ni feutanaiga i le va o le komisi o galuega a le Malo ma le asosi i le tau amataga o le masina nei i le mataupu, ma taunuu ai le komisi poo le PSC i se faaiuga e teena le talosaga a le asosi, ae faatulaga loa i se isi faiga totogi o foma’i ma alauni e maua, ma taofia le toe maua o ni tupe faasili ia latou faamanuiaga tau totogi mai itula faasili poo ovataimi.
O le sauni o le asosi a foma’i e faatino le suiga i o latou taimi galulue i le masina fou, o le a mautinoa ai le ogaoga ma tuga o ni tulaga o le a aafia ai le latou tautua faafoma’i mo le mamalu o le atunuu, aemaise o gasegase o loo sulufai i le auaunaga a le soifua maloloina mo togafitiga i soo se gasegase o le tino ma le mafaufau.
Ua faaalia e le asosi i se pepa o faamatalaga faalauaitele, o loo talia nei se isi iloiloga a le komisi o galuega a le Malo ma se finagalo o le Malo, a o lei faatinoina le suiga fou.
O le teena e le asosi o le faaiuga a le komisi o galuega a le Malo, ua tomua i fuafuaga o le tala faatatau autu fou o le tupe o loo soalaupule e le Palemene, lea o loo taoto ai le fuafuaga o le siitaga o totogi mo tagata faigaluega uma a le Malo e amata i le masina fou, ae faatino auai i totonu o le 2 tausaga.
