Ua taulai nei le silasila mamao a alii ma faipule o le afioaga o Laulii i le itumalo o le Vaimauga i faamanuiaga tau tupe o le a latou maua, i le lisiina atu o le 54 eka o fanua o nisi o aiga ma le nuu, e faagaioi ai le vilimaa a le kamupani o le China Harbour, ua latou maua le galuega o le tu’iina o papa mai auvae mauga o Laulii e vili ai le maa ma la’u e toe faaleleia ai le uafu tele i Matautu i Apia.
Faaalia e le pule o le kamupani o Setema o le tausaga fou e tatau ona mae’a ai lea galuega, ae o le lisiina o fanua o le afioaga e lima tausaga.
O le faamoemoe e faaauau pea le viliina o le maa ma ave mo isi galuega tetele e pei o le fausiaina o auala.
Ua faailoa e le afioga Leniu Vainiu Te’o o le Sa’o o le afioaga, o le feagaiga ma le kamupani o le China Harbour e maua le seleni a le nuu i faaiuga o masina taitasi.
E le gata i lea faamanuiaga ae maua foi seleni a aiga o o latou eleele o loo aofia i le lisi mo le faagaioia o le galuega e faaopoopo iai ma galuega ua maua a le malosi o le afioaga o ni faamanuiaga o le a selesele iai Laulii a o faagasolo le viliina o le maa.
O le afioga i le Sui o le Fono a Sui Tofia, afioga Le Mamea Ropati sa faatumutumu iai paia maualuluga na valaau faaaloalo iai le nuu latou te molimauina le tatala ma le amatalia o le galuega.
O le Minisita o Galuega tetele le tofa Olo Fiti Vaai o le saunoaga aami lea o le faamoemoe, ma sa auai nisi o minisita o le Kapeneta, ma faauluuluga o kamupani ma konekarate sa galulue faatasi i le tapenaina o le galuega.
