Ua taunuu alii fusu faapolofesa mai Fiti i laua ia o Senidoko o le a fetaui ma Tupuola Ato Faoagali o Samoa, ma Apisai Naciqa o le a fetaui ma Henry Tyrell o le isi alo fusu o Samoa.
O paga faapolofesa autu ia o fusuaga faavaomalo a le kalapu fusu a le Malisi o le a faia i le Aso Faraile o le vaiaso nei, i le faletaalo o le Gym 1 i Tuanaimato.
Na faailoa e le Faatonu o fusuaga a le Malisi, le susuga Tavu’i Mike Lemisio, o le faamoemoe o loo loma ua mae’a sainia ai se konekarate ma se aulagolago ua latou saunia le faailogatupe e 15 afe tala mo fusuaga faapolofesa e lua i le faaiuga o le vaiaso.
Le faatonu o Fusuaga a le Malisi, susuga Tavu’i Mike Lemisio.
Mo le alii fusu o Henry o le taimi muamua lenei o le a fusu faapolofesa ai, ae mo Tupuola Ato Faoagali o lana fusuaga faapolofesa lona lua lea ua tausinio ai i lo tatou atunuu.
Ua iai ma isi paga o faipelega o le a fetaui ai nisi alo o lo tatou atunuu a o lei faia fusuaga o paga faapolofesa.
