O loo faatautaia nei se suesuega se tasi o Polofesa mai le Iunivesite i Alabama Amerika, o Christopher Lynn i le atunuu ma e agai lenei suesuega i se tasi o measina o le TATAU.

O le masina o Mati o le tausaga nei na malaga mai lenei Polofesa ma faia ai se semina i le Iunivesite Aoao o Samoa ma talanoaina ai lenei poloketi o loo galue ai.

“O le tausaga 2018 na valaaulia ai a’u e nisi o tagata Samoa sa faatinoina se tasi o faaliga Northwest tatau Festival i Seattle o i na amata ai a’u suesuega ma lomia ai nisi o a’u galuega poo suesuega foi na autu i le tatau.

“O le 2019 na ou malaga mai ai i Samoa e faatino se isi suesuega e faatatau lea i tiga e feagai ma le tagata o loo tāina ai lenei measina aemaise o le process mai lava i le amataga o le tāina o le tatau seia oo ina mae’a ma lomia ai lenei suesuega puupuu i se tasi o magazine i Amerika.

“O le suesuega la o loo autu i ni vaega se tolu e aofia le vaai lea i le soifuaga o tagata Samoa o le aganuu, tautua ma lo latou fesootaiga i le tatau.” 

O loo faatinoina lenei suesuega i Upolu ona faagasolo lea i le motu tele i Salafai faatasi ai ma Amerika Samoa.

O lenei galuega o loo faatino i le taimi nei i le atunuu ma o loo faatupeina e le faalapotopotoga o mataupu tau Saienisi a le Malo tele o Amerika ma o loo galulue faatasi ai ma le Iunivesite Aoao o Samoa e tauala atu i le Laumua o Suesuega i Mataupu tau Samoa.