O loo sue pea e leoleo le isi pagota e toatasi e atoa iai le toatolu o i latou na sosola mai i le falepuipui e lata i le tuaoi o Kuiniselani ma Niu Sa Uelese.
O le pagota lea o Antonio David Mene e feta’ua’ina na sola ese mai ma le Palen Creek Correctional Center e tusa lea ma le 70km i le itu i Sisifo o le Gold Coast faatasi ai ma isi pagota e toalua i le Aso Sa na tea nei.
O le isi toalua ua toe maua e leoleo i Northgate ae o loo sailia pea le alii o Mene, sa tuli lona faasalaga i le falepuipui mo le tolu tausaga mo le faaaogaina faasolitulafono o se taavale.
O loo talosagaina foi e leoleo nisi e silafia faamatalaga i lea alii ina ia fesootai ane a o faagasolo ai pea sailiga.
