O loo sailia nei e leoleo se kulupu o ni alii i le mae’a o le fanaina o se tasi foi alii ma faaoolima i le toalua o sia tagata i se pate baseball i le itu i Sisifo o Sini.
Ua faailoa e le 9News na logoina leoleo i le faalavelave lea i le tea o le ‘afa o le 4 i le afiafi o le Aso Tofi talu ai, ina ua ulufale faamalosi ni alii se toalima i le fale lea i Chester Hill ma faafefe le ulugalii i auupega e aofia ai se fana, naifi ma se pate baseball.
Fai mai le lipoti o le isi o i latou ia sa faaoolima i si tina e 46 tausaga e faaaogā ai le pate ae fana e le isi alii le toalua o si fafine e 48 tausaga le matua.
Fai mai sa iai nai tamaiti i le fale i le taimi lea ae leai se tasi na afaina.
E feololo manu’aga o le tamā na aafia ma sa faia togafitiga i si tina.
O loo sue nei e leoleo le aualii ia e toalima.
