E to’alua ni aii o loo aofia i molimau e 24 a leoleo ua talia e le Faamasinoga Maualuga le tuuina atu o ni tusi saisai e sa’ili ai.
O ia alii e to’alua o nisi o molimau autū a leoleo i le faamasinoga o le a su’esu’e ai mau o le moliaga o le fasioti tagata faamoemoeina o loo tuua’ia ai Edward Fanueli ua 30 ma ona tupu tausaga o lona soifua.
O se tamaitai sa galue o se malu o le malo na fano ai lona soifua i le gaioiga solitulafono ua tuua’ia ai lea taulealea.
O lē ua maliu sa uo ma lē ua molia ma o se fiafia o le Kilisimasi o le tausaga e 2022 na faia i le aiga o lē ua molia na tupu ai le solitulafono.
O le Aso Gafua o le vaiaso nei na faatulaga e valaau ai molimau, peitai na faailoa e le loia a le itu a leoleo ua fiu e sa’ili molimau ua sa’ilia nei i se tusi saisai ua lē oo atu.
E lua vaiaso ua tuu atu i leoleo e faia ai a latou sa’iliga, ma o le tuutuuga a maua molimau ia e to’alua ona loka lea ma taofia i le vaaiga a leoleo e faatali ai le toe valaauina o le mataupu lenei tau faamasinoga i le masina fou o Aperila, e toe faatulaga ai se aso e fofogaina ai molimau.
O loo tetee lē ua molia i moliaga a leoleo.
