Ua taoto nei i le faamasinoga sili a le atunuu se talosaga ua faaulu e nisi o matai o le afioaga o Laulii, ua latou lu’i ai le afioga i le Sa’ofaapito le afioga Leniu Vainiu Te’o ma nisi o matai e toatolu o loo faailoa suafa i pepa o faamaumauga a le faamasinoga, ona o le 2,175 eka o fanua umia saoloto o loo i tuāmaota o le nuu.
O se vaega o ia eleele o loo faaaoga e le kamupani mai Saina o le China Habour e vili ai le maa o loo faaaogā i le galuega o le uafu tele i Apia.
O le Aso Gafua o le vaiaso nei na valaau ai mo le taimi muamua le mataupu, ma na faaalia e le loia o loo tulai mo le itu a matai e silia i le to’a 50 o loo iai suafa i le talosaga, o Mati o le tausaga na tea nei na faaopoopo ai le suafa o le Sa’o o le nuu ma nisi o matai i le lesitala o ia eleele.
O le finauga a le itu talosaga e pei ona faailoa e le latou loia o Tanya To’ailoa, e tatau ona toe foi le lesitala i le mea sa iai muamua ua na o alii ma faipule.
Ua tolopo faagasologa o lenei mataupu i le aso 17 o le masina nei o Iulai se’i tālia se tali tusitusia a le itu o loo faasaga iai le talosaga.
