Ua lē faatali nisi o nuu o le atu Safata se’i mae’a galuega e aveesea ai suāuu mai le manuao o le Manawanui o loo goto i o latou gataifale, ae ua sa’ili atu se fesoasoani i le malo o Saina.
O lea ua faailoa i se lipoti a le leitio a Niu Sila le feiloa’i ai o ni sui o ia afio’aga ma se sui o le ofisa o le malo o Saina i Samoa ma faatalanoa ai pe faapefea ona faatino e Saina se fesoasoani mo ia afio’aga o loo aafia gataifale ona o suāuu mai le manuao.
Ua faaalia e se tamalii o le itumalo i lea lipoti le afioga Tuia Paepae Letoa, ua iai le naunauta’iga o Saina e fia fesoasoani ona o aafiaga mai le manuao ua goto ai i o latou gataifale.
O loo tumau pea ona tapu le fagotaina o ogasami o nuu o loo aafia gataifale i le galuega o loo faatino nei o le aveesea o suāuu mai le manuao.
Ua faaalia ai foi e Tuia sa latou talosagaina se fesoasoani mai lo tatou malo e ala i le matagaluega o galuega tetele o loo vaaia le galuega o loo faatino, ae o le tali ane a lea matagaluega ua na o le ofisa o le Palemia e maua ai se tali.
O loo iai le mana’oga o nuu o le atu Safata e faia se latou lava sa’ili’iliga i ni aafiaga o le latou siosiomaga ma le gataifale ona o le goto ai o le Manawanui.
O le vaiaso nei na faailoa ai e le Ofisa Sili o le fitafita o le puipuiga a Niu Sila le mae’a o le vaega lona lua o le aveesea o suāuu ma vai leaga mai le manuao.
