O meapu’eata a se faleoloa i Lotopa na mafai ona fesoasoani i sailiga mo le fia maua o ni alii talavou se toalua na ulufale i lea faleoloa ma la faatino ai se gaioiga solitulafono.
O ata na salalau i luga o upega tafailagi na iloa ai ia alii o loo aui o la ulu i ni ie e foliga o ni ofu ma tau lē iloa ai o la foliga.
O le tasi o i laua na ia pupuni le fofoga o le tamaitai sa tu i le masini talatupe ma foliga o se isi gaioiga na ia faia na solovi ai ma palasi i lalo le tamaitai ma taumafai loa e tatala le masini o tuu ai tupe.
Na vave ona alu ane se tasi o tamaitai o le faleoloa ma momo’e faavave ese ai le isi taulealea, ma alu atu ma le isi na taumafai e tatala le masini tuu tupe ae e lei mafai.
O loo taofia nei ia alii i le vaaiga a leoleo ma ua faailoa e se molimau o le tasi o ia taulelea talavou, e lei leva ona magalo sa tuli sona faasalaga i le falepuipui.
O le tausaga e 2020 le taimi mulimuli na aliali mai ai ia ituaiga o solitulafono o le osofai o faleoloa ae maua uma lava i meapu’eata poo security cameras.
E lei maua se faamatalaga mai leoleo e tusa o le gaioiga solitulafono ua nofo taofia ai alii talavou e toalua.
