Na agiagia i le aso ananafi le tagavai o le atunuu i le paka i tuāmaota o le Malo i Apia ina ua faaula le pine auro muamua a le ‘au a Samoa i le tamaitai o Anne Cairns. 

E 16 kilomita le umi o le tuuga mo vaa nofoa tasi i le vaega o tamaitai na finau ai Cairns mo se ‘ai mo lona atunuu.

Na ta’ua e Cairns lona finau i le umi na faatulagaina ai le tuuga.

“E ui i nai suiga laiti i le course e faatino ai le taaloga ma le delay ona o le sou o le sami sa lē mafai ai ona faatino i le vaega e ao ona faia ai. 

“Sa ou tuu lava i le mafai e gata ai ina ia mafai ona faasoasoa lo’u malosi ia uma taamilosaga e 4.” 

“Ina ua tau lalata mai le vaa a si uso mai Hawaii o iina na ave uma ai lo’u malosi e finau ai le tulaga muamua o le tuuga.”

Ua iloga lenei tamaitai i tuuga tetele i tausaga ua mavae e tauave ai le fu’a a le atunuu e pei ona pine siliva ai i le tuuga i Lonetona a le lalolagi poo le World Sprints.

“O se pine faamau lenei o lo’u olaga alovaa, e ese foi lagona i lenei taumafaiga aemaise ai o le faamoemoe a le lalolagi lea ua manuia faiva sa feagai ai auā si o tatou atunuu ma e lē mafai ona galo.

“O nisi foi o tamaitai sa o matou tauva e masani foi ona matou tauva i isi tuuga faavaomalo.”

Ua 10 tausaga o faatino e lenei tamaitai faagatama i le tai e aofia ai ma le taaloga o le kayak ma sa fai ma sui o Samoa i le Olimipeka i Rio i le tausaga 2016 ma le Olimipeka i Tokyo i le 2020. 

“O le isi faamoemoe o loo tapena atu ai o Taaloga al e Pasefika ia Novema e fiafia foi e tauave le tagavai a lo tatou atunuu i alogavaa.” 

O nisi o pine na maua e Samoa mai tuuga i le aso ananafi e aofia ai le pine siliva mai le vaega laiti 16 tausaga a tamaitai ma le pine apamemea sa manumalo ai foi le vaega o tamaitai 19 tausaga.