Ua fai tā’ai i tau’au o latou laei, ma pulou taumata o a latou pine faapea ma fusiua, ua mata’ina ai le togiga fou a le aufaigaluega a le ofisa o femalagaa’iga i le matagaluega a le Palemia ma le Kapeneta, ua pei ai o ni fitafita poo ni pailate o vaalele.

O vaaiga ia o ata pu’e i le tutulalai mai o alii ma tamaitai o le ofisa o femalagaa’iga e faailoa le latou togiga fou, a o molimauina e lo latou Minisita le afioga i le Palemia, Afioga Fiame Naomi Mataafa.

Ua faailoa i se pepa o faamatalaga o se togiga na faatupe e tauala mai i se faigapaaga ma le faalapotopotoga o tulaga tau femalagaa’iga i le Pasefika.

Na saunoa le Palemia i le faalauiloaina o le togiga fou ma ia afea ai le tāua o le iai o togiga e iloagofie ai se ‘au poo se faalapotopotoga, ma momoli atu ai se feau o le maopoopoga ma le galulue soosoo tau’au o ē uma o galulue ai.

O le faamalosi‘au a le Minisita le afioga i le Tamaitai Palemia i le au aigaluega, o le togiga o o latou ofutau o se faamanatu ia faatāua ma maelega i le puipuiga o tuaoi faavaomalo o Samoa ina ia malu le atunuu.