O popolega i le ono faaitiitia o manaoga tau pisinisi i le faaaogāina o suauu ma penisini i le lalolagi, ma le tulaga faifai pea o faaletonu tau tamaoaiga o atunuu, ua mafua ai ona faapa’ū le tau o ia oloa i Samoa mo lenei masina lona fitu o lenei tausaga.
O tau fou o Iulai 2023 ua pa’ū ai i le 3 tala 16 sene i le lita le penisini e faatusa i le tau sa iai i le masina o Iuni sa 3 tala 40 sene i le lita.
O le suauu kiso sa 3 tala 35 sene i le lita o lona tau fou ua 3 tala 16 sene i le lita.
O le tau fou o le kalasini ua 2 tala 79 sene i le lita e faatusa i le tau o Iuni sa 2 tala 98 sene i le lita.
I le pepa o faamatalaga mai le ofisa o le Minisita o Tupe ua faailoa ai tau fou o nei oloa, ua faaalia ai o le lua masina talu ona faalauiloa le faaitiitia o le suauu gaosia ae toe faia se fonotaga i le atunuu o Vienna a sui o atunuu o loo puleaina suauu i le lalolagi le OPEC ma talanoa ai le faaitiitia o le toe gaosia o suauu.
