O le Manatua ma Faaaloalogia atoa ai ma le Patipatia na lē gata ua maua tonu ai le agaga o le Faamanatu ai o le Aso mo tagatanuu o le Malo o Ausetalia ae o le faigapaaga i le va o Samoa ma Ausetalia e ao lava ona faatumauina.
Na aufaatasi tagatanuu o lea malo o loo alala i Samoa i le po o le Aso Lulu i le maota o le Komesina Maualuga o Ausetalia i Tiapapata.
E lē gata i le faamanatu ai o lea aso tāua i le soifuaga o tagatanuu o Ausetalia ae o le faafeiloai atu foi i le suiga o Pulega mo lea atunuu i Samoa nei e pei ona iai le susuga ia William Robbinson e sui tulaga ia Emily Luck sa galue mo Samoa talu ai nei.
O upu faafeiloai a le alii Komesina Maualuga mo Samoa sa ia manatua ai lo tatou sootaga i lo tatou siosiomaga i le sami ma le laueleele e lē gata i lea o lona faaaloalogia ai o tatou tagata, o la tatou aganuu ma o tatou tupuaga.
Ma na ia ta’ua o Samoa ma Ausetalia e aufaatasi e faatāuaina o i tatou o malo faatemokarasi, e tausia le filemu, o le tulafono ma le saolotoga ma le aiātatau e tautala saoloto ai, o le faailoaina o faiga faapoplokiki, saolotoga o talitonuga faalelotu, o faasalalauga lelei, ma le aiātatau tatou te filifilia ai o tatou taitai.
Sa faailoa foi e Robbinson le tuu mai ai o le tau’au o Ausetalia e ala i fesoasoani mo le atunuu i lana taligamalo i le fonotaga ia Oketopa.
O le afioga ia Toeolesulusulu Cedric Schuster na saunoa mo le malo o Samoa i lea faamoemoe o le malo o Ausetalia.
