O le palota e faataga ai ona faia se fesili faapalota poo se referendum e faatatau i se leo o tagata Indigenous Voice to Parliament na sologa lelei lona faataunuuina i le Senate i le asō ina ua pasia, o lona uiga la o le a sauni loa mo le palota a le atunuu e faia iai i le faaiuga o le tausaga nei.

O le pili ina ia faia se referendum poo se fesili faapalota e faailoa ai finagalo o tagata o loo lagolago iai le faigamalo a le Leipa ma isi o le pati a le Liberal e ui o loo tetee iai lo latou taitai o Peter Dutton.

O le fesili faapalota la lea o le a fesiligia ai tagata Ausetalia pe alagatatau ona faatuina se totino faufautua a Indigenous Australians i lalo o le faavae o le atunuu.

O lea totino o le a leai sona malosiaga tau le Palemene poo se malosiaga foi e suia ai ni tulafono e pasia e le Palemene.

Na saunoa ai le faipule o le Leipa mai le Northern Territory o Malarndirri McCarthy, o le palota i le Voice o se palota foi lea mo se lumanai manuia.