Ua iai lipoti ua ta’ua ai le mae’a faatauina uma o pepa matamata mo le fetauiga a le Toa Samoa ma le Kiwis i le Aso Sa nei i Sini.
Molimauina e talafou aemaise lava i le itu i Sisifo o Sini, le tele o tapenaga a le autapua’i a itu uma e lua auā lea faamoemoe mo le sa’iliga o le siamupini o le Pasefika i le faagatama o le lakapi liki.
Mo nisi o le atunuu ua faailoa o le naunauta’iga ia faailoa i tama taaalo o le Toa o loo tele le lagolago ma le mulimulita’i o tagata Samoa i Sini ia latou taumafaiga.
O nisi sa faailoa e fia faailoa i le Toa Samoa le tele o le faamoemoega o le atunuu o loo tuuina ia i latou ia manumalo ai i lea taaloga.
E le’i faatamala le autapua’i ma le aulagolago a le Toa i Sini ina ua faatinoina le aso faapitoa mo latou le Fan Day i le Aso Lua o le vaiaso nei ma sa faamaonia i le to’atele o le atunuu na auai ai ma a latou fua ma faailo o faamalosi mo le ‘au.
Na maua ai foi le avanoa e feiloa’i ai i tama taaalo ma ave le latou faamanuia mo taumafaiga i le Aso Sa o muamua.
E iai foi la tapenaga a le aumaimoa ua fuafua e faatino i lea aso o le taaloga e pei ona maitauina i luga o le facebook, fuafuaga mo le usuina o se pese lotu Samoa a o le’i amataina le taaloga ma le faia o se savali aga’i i le nofoaga e faia ai le taaloga e faamalosi’au atili ai i le ‘au a le atunuu.
