O le taumafaiga ina ia lava se faalauiloa e tuuina atu i tua i le atunuu ma ia malosi ai se lagolago i le mau e tetee atu i le kanesa, lea ua avea ma faama’i o le faapogai lona tolu lea o le maliliu o tagata i totonu o Fiti, o le ala lea ua galulue soosoo tau’au ai le Sosaiete o le Kanesa a Fiti poo le Fiji Cancer Society (FCS) ma se a’oga faafoma’i iloga i totonu o le atunuu i le faaitu i Sisifo (Western Division).
Na faailoa le maofa o le Ofisa Sili o le FCS, susuga Belinda Chan, i talanoaga sa faia talu ai nei i le latou feiloa’iga ma le pulega a lea a’oga faafoma’i, le Umanand Prasad School of Medicine and Health Sciences (UPSMHS) i le laumua o le Iunivesite a Fiti i Saweni i Lautoka.
Na ta’ua ai e Ms Chan, o lea ua malilie le UPSMHS e galulue soosoo tau’au ma lagolagosua i le sosaiete i le tele o auala, e pei o le faia e lē aunoa o siaki ma fā’ata i nofoaga eseese o le Iunivesite i totonu o le atunuu, ma ofo atu foi lo latou taimi e auai ma faia so latou sao i ni faalauiloa mo le soifua mālōlōina e faatulaga e le FCS, poo nisi lava meafai.
O le fiafiaga lea o le Ofisa Sili, Ms Chan ona o le naunau o le UPSMHS e faaavanoa mai a latou tagata a’oga faapea foi le aufaigaluega, e lagolago mai i fuafuaga a le sosaiete ina ia matuā lava se faalauiloa o le tetee atu i aafiaga o le kanesa ua avea ma gasegase tugā o loo faaauau pea ona aafia ai le to’atele o le atunuu.
O le isi itu tāua i nei talanoaga, ua faatalosagaina ai foi e le sosaiete le pulega a le iunivesite ina ia uunaia pe faaosofia le naunau o a latou fanau a’oga e ave mataupu e faalautele ai a latou su’esu’ega i le gasegase lenei o le kanesa, ma se faanaunauga ia avea ai o ni foma’i e faapitoa o latou tomai i mataupu poo trained specialists mo le togafitia o lenei gasegase matuiā o le kanesa, e pei o le mataupu o le oncology.
Ta’ua e le Ofisa Sili le telē o le mana’omia o ni foma’i faapitoa i lea tomai auā o le taimi nei, e na o le to’atasi lava le foma’i ua atoatoa lona agavaa ma tomai i lea matātā (fully qualified and highly experienced oncologist) i totonu o Fiti.
Na saunoa le Acting Dean a le UPMHS, Dr Abhijit Gogoi, e telē se aogā o lenei galulue felagolagoma’i a le UPSMHS ma le Sosaiete o le Kanesa i Fiti le FCS mo i latou uma lava o le a galulue ai, aemaise lava i fanau a’oga o le a matuā faatamaoaigaina ai i tomai ma le atamai o le a latou maua a o tauofo ai o latou taimi e galulue ma a’oa’oina atili ai i nei vaega eseese.
Na saunoa Dr Gogoi, “Ua matou nofo sauni ma naunau e galulue faatasi ma le Sosaiete o le Kanesa a Fiti, e tauofo atu o matou taimi e galulue ai i le taimi nei se’ia oo ina tatou fausia se isi autasiga mo ni fuafuaga faataatitia i se taimi o i luma.”
