O le kamupani o loo feagai ma le poloketi o le Auckland City Rail Link ua toe talosaga nei mo se isi $1.074 piliona mo le faatupeina o le galuega.
Ua lipotia i le One News i le asō o lea vaegatupe o le a faaaopoopo atu i luga o le $4.419 piliona o le tau aofai sa fuafuaina muamua o lenei galuega o lona uiga o le a oo atu nei lona tau aofai i le $5.493 piliona.
O loo talosagaina e le poloketi lea vaegatupe mai ana lagolago e toalua o le Crown ma le Pulega a Aukilani.
E faaopoopo atu i lea vaegatupe faaopoopo, ua faailoa o le a toe faaumiumi atu le galuega faatoa mae’a ia Novema 2025 e pei ona faamaonia i se pepa mai le Council i le asō.
O mafuaaga o lenei tulaga ua ta’ua ai le faatuai ona o aafiaga o le koviti ma vavao sa faia sa faaitiitia ai le aofai o le aufaigaluega atoa ai ma isi mafuaaga tau galuega.
Fai mai le faauluuluga o le poloketi Sean Sweeney e tatau ona malamalama tagata i Aukilani i aafiaga o le koviti i tagata faigaluega aemaise o vavao sa faatino i lea taimi ma o le talosagaina o le vaegatupe faaopoopo lea o le a le taofia ai le faatinoina pea o galuega lea o loo faagasolo pea mo le fausia o le uluai underground metro rail network a Niu Sila.
