Ua aveina e leoleo se vaega tele o aseta ma tupe i le latou osofaiga i Sini i le vaiaso nei, o lea osofaiga ua aveina ai e leoleo ma fale tetele o mansions, o se fanua tele e oo atu i le 47 miliona lona tau, 29 miliona o crytocurrency faapea ai ma uati taugata.
O le osofaiga na pueina ai tagata e toaiva i le Aso Lulu ma ua ta’ua afai e faamaonia moliaga e oo atu i le 25 tausaga e ono falepuipui ai lē sa avea ma taitai i nei faiga faasolitulafono.
Fai mai o le kegi lea sa galulue o se underground bank latou te feme’ia’i tupe e maua mai soligatulafono i accounts eseese i atunuu i fafo mai lava i le 2018-2022.
O le suesuega sa faatino e taitai ai leoleo Ausetalia, Australian Federal Police ma le Criminal Assets Confiscation Taskforce ma o latou tuuina ai poloaiga e faasā ai ona o latou toe uia pe afea le silia ma le 20 o fale i Sini ma se fanua e 360 hectares e lata i le nofoaga o le malaevaalele lona lua faavaomalo ua fuafua i Sini.
Na ave foi e leoleo taavale taugata, o teugatupe, uati ma ato taugata faapea foi ma jewelleries.
Ua ta’ua mai e leoleo o loo faagasolo pea le suesuega ma e ono iai nisi aseta e toe aveina foi e leoleo ma ua tuu atu ai ma sa latou lapataiga i le ausolitulafono o loo mataituina i latou e leoleo aemaise lava kulupu e aofia i le teuina faasolitulafono o tupe poo money laundering.
