O le Aso Faraile talu ai, 16 Iuni 2023, na toe laasia ai foi e le alii ta’uta’ua poo le fetu pupula a le Manu Samoa taitoafitu, Vaafauese Apelu-Maliko, le laina sikoa ae o le laina sikoa sili la lea ona tāua i lona soifua, ina ua faapaiaina ma aloaia le la osigafeagaiga ma lana manamea, le tamaitai ua leva ona tuu atoa iai lona alofa, le tamaitai o Angeline Fagaote.
O se sauniga e lei matuā toatele nisi na auai, sa na o la aiga vavalalata, ma uomamae aemaise le pulega ma le ‘au a le Manu Samoa o loo taalo ai le alii faaipoipo.
I se lipoti a le Samoa Global News o loo ta’ua ai, o le tausaga e 2017 na amata mai ai le mafutaga a Maliko ma lana manamea, ma e toatasi si o la alo tamaitai ua 4 tausaga le matua, o Lesina, ae o lea la ua faapaia aloaia le mafutaga i le Aso Faraile na tea nei.
O le faletalimalo a le Millenia Hotel na faia ai lenei sauniga ma faagasolo uma ai fuafuaga o lo la aso fiafia.
O le alii faaipoipo o Vaafauese Apelu-Maliko o ona tupuaga o Mutiatele i Aleipata le afioaga o lona tamā, ma lona tina e mai le afioaga o Lufilufi.
O le tamā o le tamaitai faaipoipo o Angeline, e mai Fusi Saoluafata, Salelesi ma Saina, ma lona tina e mai Solāua ma Saoluafata.
O le aso o le faaipoipoga a Maliko ma Angeline na faailoa ai foi e le tamā o le tamaitai faaipoipo i le taimi o lana lauga, o lea o le a faamavae ai foi ma Vaa mai le Manu Samoa, ona o lea ua saini le konekarate mo le 2 tausaga i se tasi o kalapu lakapi i Falani, ma ua fuafua ai nei le ulugalii fou e toe lua vaiaso ona malaga atu lea i Falani mo le konekarate fou a Vaa.
O le alii o Vaa Apelu-Maliko e pei ona avea nei ma kapeteni o le Manu Samoa 7s na iloga lona tulai mai ina ua mae’a le taamilosaga e pei ona iai talu ai nei mai Dubai, ina ua avea o se tama taalo muamua mai ‘au a le Pasefika ua mafai ona ia ausia le manumalo i ni faailoga tāua e 3 – tama taalo sili ona maoa’e lana taalo (DHL Impact Player Award), tama taalo e sili ona tele ana sikoa (Gilbert Top Try Scorer), ma o ia le tama taalo e toatasi mai le Manu Samoa ua filifilia i le dream team a le lalolagi atoa (2023 HSBC Dream Team).
