O le faiaoga lea ua faasauni mai o le All Blacks o Scott Robertson fai mai a ia o loo tatala lava le avanoa i lona manatu e faatatau i le filifiliga o tama taaalo mai fafo atu o le atunuu mo le All Blacks.
O le taimi nei e na o tama taaalo o loo iai konekarate i Niu Sila i le Super Rugby poo le NPC, o latou ia o loo mafai ona fili i le All Blacks peitai a oo mai le 2024 o le a iai sona aafiaga auā o le toatele o tama taaalo o le a agai atu i isi atunuu i le mae’a o le Ipu o le lalolagi i Farani.
O le taimi nei o Beauden Barrett, Brodie Retallick, Aaron Smith, Richie Mounga, ma Shanon Frizell ua iai uma konekarate ua sainia i Iapani a o Ardie Savea o le a lē toe agavaa foi e taalo mo le All Blacks i le tausaga fou ona o le tausaga e tasi o le sabbatical o le a taalo ai i Iapani.
O le agai ane la o Robertson i le ‘au i le mae’a o le Ipu o le lalolagi i le tausaga nei ua faailoa e ono iai foi la ma se suiga i le filifiliina o tama taaalo o le ‘au.
