Ua ofo mai e le kamupani vaalele a le Ea Niu Sila le avanoa e mafai ai ona fetuunai le faaaogaina o pepa malaga poo tickets mo faigamalaga ona o tulaga faaletonu o le tau ma le afā o Gabrielle.
O uiga louloua o le tau o loo agai i le Upper North Island i le faatoa lua ai o vaiaso talu ona mae’a lologa i Aukilani.
E ui e le o mautinoa tonu poo gafea o le a tele sona aafiaga mai le afā ae ua fautuaina tagata uma ina ia nofo sauni ma tapena.
Ua faia ai le faaiuga lea e le Ea Niu Sila ina ia mafai ai ona fetuunai le faaaogaina o pasese ua mae’a ona totogi mo faigamalaga mai Aukilani, Whangarei, Kerikeri, Tauranga, Hamilton ma New Plymouth mai le va o le Aso Sa a taeao, aso 12 o Fepuari agai i le Aso Faraile 17 o Fepuari.
Ua fautuaina ai e le kamupani vaalele i latou e le o iai se tulaga faavavave e malaga ai non urgent travels ina ia toe faatulaga faigamalaga i se taimi mulimuli ane.
E mafai ona taofi le credit poo le pasese e toe faaaoga i se taimi mulimuli ane i totonu o le 12 masina pe toe faatulaga foi i se isi aso e tutusa ai pasese ia alofia ai le toe totogi o nisi tupe faaopoopo.
