Ua faaleo se lagona o le Afioga i le Faamasino Sili ia Satiu Simativa Perese i le vaiaso nei, a o iai le Matagaluega o Faamasinoga i lana taligamalo i Faamasino Sili o atunuu e 15 o le Pasefika i le mataupu e faatatau i tulafono ma ia ta’ua ai o loo iai nisi o tulafono ua tatau ona suia.
E lei faamanino mai e le Faamasino Sili poo ā tonu tulafono peitai, o loo iai tulafono na fausia mai lava i le tausaga 1960, o loo iai foi tulafono ua mafai ona toe teuteu, e lē gata i lea o tulafono lea foi o loo agai iai galuega a le Faamasinoga i le taimi nei e ala lea i le toe tilotilo toto’a iai o le Faamasinoga e pei o tulafono e tolu lea o loo tele ina faitio ai le atunuu.
Ua ta’ua le lagonaina e le atunuu o nisi o aafiaga ogaoga ona o ia tulafono.
Aemaise ai foi o tulafono o Faigapalota lea sa faapea nisi ua faatopelau, ma ua faia ai suiga, ma ua avea e pei o se mea e taofiofi ai sui usufono, pe o aafiaga foi i itumalo palota ma tagata palota.
E manino mai le saunoaga a le Faamasino Sili o loo iai tulafono ua lē tatau ona toe faaaogāina e lo tatou atunuu, ma o le faia o se suiga iai o le a fesoasoani tele lea i le galuega a le Faamasinoga o loo taumafai nei e foia le tele o faafitauli e tulai mai ma soligatulafono ona ua televave le lalolagi ae o loo tumau pea Samoa i tulafono ua au tausagā.
