O le afioaga o Satitoa i Aleipata o loo faagasolo ai se aoaoga e taimua ai le Ofisa o le Siosiomaga a le Pasefika o nisi o sui mai Ausetalia faapea Samoa nei.
O lenei aoaoga o le a agai lea i nisi o vaega faatulafonoina ma auala o fesootaiga o loo faaaogā i afioaga e faasoa ai faamatalaga.
O se tasi o fesoasoani o loo faaaogāina e asia ai ‘amu ma aau ua ta’ua o le Pacific ReefCloud sa faatupeina e le Malo o Ausetalia o loo faaaogāina lea e le vaega o siosiomaga a le Pasefika ma le Matagaluega o le Siosiomaga.
O lenei system e tapueina ata mai lalo o le sami ona iloilo lea faatasi ai ma le faaaogāina o tomai faaleaganuu.
Na ta’ua e le Sui a le Vaega o le Gataifale a le Ofisa o le Siosiomaga a le Pasefika, Peter Davies o ia foi o loo taimua i lenei poloketi, o le ogatasi ai lea o fuafuaga faataatitia o le poloketi ma lenei aoaoga.
“O vaega uma ia e auina faatasi mai ai le tomai faasaienisi ma le tomai faaleaganuu i se auala e mafai ai ona atina’e se framework e faailo ai vaega o faasao o i le gataifale ma e mafai ona faatino e le Malo ma afioaga.”
A o iai i le fausia o lenei fuafuaga o loo galulue faatasi ai le Ofisa o le Siosiomaga a le Pasefika ma ana paaga ina ia agai i luma le puipuia ai o ‘amu ma aau i le Pasefika i le tuufaatasia ai o tomai faasaienisi ma le faaleaganuu.
