Na saunoa le alii Minisita o Felauaiga ma Galuega Tetele ia Olo Afoa Fiti Vaai, o lipoti lē atoatoa o se faiga faapolokiki e taumafai ai e faatuai le tuuina atu o lipoti i le Palemene.

Na ta’ua e Olo ua au tausagā o finauina pea lea mataupu o le tuuina atu lē atoatoa o lipoti i le Palemene, e leai ni fuainumera peitai o loo manino i Tulafono tumau o le maota lea vaega e taialaina ai le galuega a Komiti faapalemene.

E silasila ai i tulafono ma faiga faavae a le Malo poo mulimulitaia e matagaluega i le faatinoga o a latou galuega, aemaise ai o le auiliili lelei e Komiti Faapalemene o tupe maua ma tupe faaalu a matagaluega.

Na ta’ua e Olo o le faatuai lea o se faiga a le malo talu ai, ma na ia talosagaina ina ia aveese lea faiga.

Sa tulai le taitai o le Itu agai ia Lauofo Fonotoe Pierrer Lauofo ma ia faaseseina lafoga a le alii Minisita ma ta’ua ai o lipoti faaletausaga e mae’a le paeaiga na tea nei, ua atoa uma i le ofisa o le fono, na pau le tulaga na faaletonu ai ona e lei maua se avanoa e tuuina atu ai i le Palemene i ana pepa o galuega.

Na teena e le taitai o le Itu agai ni faiga faapolokiki e pei o le faatuai ai o lipoti, peitai e tuai lava le oo atu o lipoti ae e oo atu foi ia lipoti ua malamalama le atunuu e leai se mea o natia, ma o lipoti a Matagaluega e le avatua ai ni tala o tupe.

Sa toe tulai le alii Minisita ma faapea o le taimi e iloilo ai lipoti a komiti e tatau ona iai ma tala o tupe ina ia atoa mai ia latou lipoti i le Palemene, peitai e le o iai ni accounts i totonu ma ua le talafeagai ai upu ma tala ia e avatu i lipoti ona o lea e leai ni fuainumera i totonu.

Saunoa Olo o le faataitaiga o Poloketi a le Malo e tai fia miliona poloketi tetele, peitai e le o silasila iai le Palemene i le auiliiliga o le faaaogaina o ia mau miliona.

Ae o le matafaioi lea a le Palemene e silasila toto’a pe o faapefea ona faaaoga mai e le malo tupe ia.

O le tau faaiuiu ai o talanoaga i lipoti a Komiti Faapalemene na agiga ai manatu ma lagona faafetai o nisi sui faipule ina ua toe faia le tulaga lea o le talanoaina o lipoti nei.

Sa faaalia ai foi ma le agaga faafetai o le sui Faipule o Vaimauga 1 ona e leai lava se tulaga o masalomia ai pe na faaletonu le faaaogaina o tupe e le faigamalo talu ai, o se tulaga na ia ta’ua o lea sa tele ai lafoga a le atunuu. 

O le ala lea o le tulai o le alii minisita ma faamanino le lē atoatoa o lipoti o loo tuuina atu.