O le afiafi ananei o le a faataunuu ai le faatasiga a sui o le Pacific Justice, o lenei faamoemoe o loo ‘auga lea i le omai faatasi o o tatou tagatānuu i Aukilani nei, ina ia talanoa ma faasoa i taumafaiga o le maua ai e o tatou tagatānuu Pasefika o le avanoa e femalagaa’i ai e aunoa ma le faia o ni visa, e pei ona masani ai le faatinoga – o le faia o talosaga poo le apalai ina ia maua le faatagaga e ulufale mai ai i totonu o Aotearoa nei.
O le finau a le Pacific Justice, ina ia tutusa uma atunuu i lalo o ta’iala o femalaga’iga.
Ia maua e Samoa ma atunuu o le Pasefika le avanoa e pei ona maua e le silia ma le 60 atunuu o le lalolagi o loo faataga ona ulufale i Niu Sila e aunoa ma se visa.
O se matāupu ua maitauina le omai faatasi ai o sui o tagatānuu iloga e finauina e aofia ai le afioga ia Anae Aurthr Anae ma nisi ua mata’ina taumafaiga ina ia maua e tagatānuu Pasefika avanoa tutusa ma isi o atunuu o le lalolagi.
Faamaonia mai le faatino ai o se tautalaga a le alii Palemia, Susuga Laaulialemalietoa Polataivao Fosi Schmidt e ala i se ata pu’e, ma e faamauina le auai o le Konesula o Samoa i Niu Sila nei, Afioga Afemata Lemalu Palusalue Faapo II.
E faatalitalia pe ā ma le 100 tagata o le a auai i lenei faatasiga tāua.
O le a faia le faamoemoe i le Fale o Samoa i Magele.
