Minisita o Tupe, Mulipola Anarosa Ale Molioo

O le a talanoaina le tala faatatau autu muamua o le tupe i le vaiaso nei.

O le aso amata o lenei vaiaso fou o le a faatoa oo atu ai i le laulau a fono o le Kapeneta le tala faatatau autu muamua o le tupe a le faigamalo fou mo le talanoaina.

E le’i taunuu le fuafuaga sa iai o le Aso Faraile 27 o Aukuso e folasia ai e le Minisita ma le Minisita Lagolago o le Tupe i luma o le laulau a fono o le Kapeneta lea tapenaga ona e iai nisi o vaega e le’i maea lelei ona faatoa soalaupule lea o le tala autu muamua o le tupe a le Kapeneta o le faigamalo a le vaega faaupufai o le Faatuatua i le Atua Samoa ua Tasi (FAST i le Aso Gafua mulimuli o lenei masina o le a maea.

O le a silasila foi i nisi o fuafuaga na o latou finauina i le palota tele ua maea o le a faataoto i lea fuafuaga tau tupe.

O se galuega foi o le a faatino e aunoa ma le auai o lē sa faauluulu iai le Matagaluega o Tupe a le Mālō le susuga Leasiosiofaasisina Oscar Malielegaoi ona o lea ua faamavae ona o se manaoga a le tamaitai Minisita.

O le Aso Faraile na te’a nei na faailoa ai e Leasiosiofaasisina i luga o auala o fesootaiga faaonaponei o lana faaiuga ua ia talia ai le tusi a le Minisita o Tupe le afioga Mulipola Anarosa Ale Molioo ia faamavae ma le tofiga Ofisa Sili o le matagaluega.

O ni ripoti i vaiaso e le’i mamao atu na faailoa ai e le Palemia i le feiloaiga ma Tusitala le feagai o le Minisita o tupe ma le faafitauli o le faigata ona galue atu e faatino fuafuaga o le Tala autu muamua o le tupe a le faigamalo fou ae o le faauluuluga o le matagaluega o lana fautua ae o le tuaā tāmā o le Ofisa Sili o loo taitaia le vaega faaupufai a le HRPP o le a ia lu’iina le tala o le tupe muamua.

O le fautuaga a Leasiosiofaasisina i le aufaigaluega ia ave atoa le latou lagolago 201% i le faatinoga o le tautua i le Mālō ma le atunuu.

Na ave foi le faamalo ma faamanuiaga a le tamaitai Minisita i le susuga ia Leasiosiofaasisina mo lana tautua ia Samoa e tauala atu i le Matagaluega o Tupe i tausaga e tele ua tuanai.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required