Ua folafola e le Leipa o le a o latou faafaigataina mo tagata talavou le faatauina o vapes ma o le a o latou faia ni faasalaga ogaoga mo i latou e tuuina ane vapes i talavou.
O le taeao analeila na folafola ai e le Palemia o Chris Hipkins lea tulaga o le a faatino pe afai ae toe tulai mai le Leipa i le faigamalo.
O le a faatapulaa ai foi ma le aofai o faleoloa e faatau ai vapes i le na o le 600 i le atunuu atoa.
Fai mai le Palemia e matuai lē taliaina le tulaga maualuga ua iai nei le aofai o tagata talavou e faaaogāina vapes ma e manatu o le au faatau vapes ua taulai mai a latou faatauga i tagata talavou ma tamaiti.
Fai mai le Palemia e manino le manaomia o se isi gaioiga faaopoopo e ao ona fai ma e manaomia ai nisi faiga e malosi atu.
