O Laulii o se tasi o afioaga o le itumalo faapalota o Vaimauga numera tasi ua faatali i le latou miliona tala lona lua, pe a mae’a faaaogā lana uluai miliona lea ua faamatuu se vaegatupe e selau afe tala, e fausia ai le nofoaga tutotonu o galuega o le atinae manuia o tina o le nuu o Laulii.
O se nofoaga ua mae’a fausia ma o le a faaaogā e toe faaiila ai le tomai o tina o lea afioaga o le lalagaina o fala, ato ma isi galuega taulima.
O se nofoaga foi ua faagaioi ai ma se pisinisi a tina o le latou vaiauli mamā mo le atunuu na foai ai e le kamupani a Frankies se masini e faamamā ai le vai manino mai le faatanoa vai a Laulii o loo i tuāmaota o le nuu.
Faaalia e le faipule o Vaimauga Numera Tasi na saunoa e tatala le nofoaga tutotonu o galuega o le atinae manuia o tina o Laulii, o le poloketi tasi le miliona o se fuafuaga tāua tele a le Malo auā ua mafai ona fausia ai se nofoaga mo galuega o le atinae manuia o tina o lona itumalo.
Le sui faipule o Vaimauga Numera Tasi, Afioga Sulamanaia Tauiliili Tuivasa.
O le tatalaina o le nofoaga o galuega o le atinae manuia o tina o Laulii, na tatala ai foi ma se isi pisinisi e maua ai oloa mo galuega o le lotoifale o le aiga, o se taumafaiga a se ulugalii Saina ua o la lisiina se vaega o le nofoaga o loo iai le maketi a lea afioaga.
