E toalima tamaitai talavou lalelei o le a faia i ai le faaiuga a faamasino i le afiafi nanei, poo ai o i latou nei o le a tulai mai e tauave le pale o le Miss Samoa NZ poo le Tausaga o Samoa i Niu Sila nei.

E toalua tamaitai mai Kalaiesetete ma le isi toatolu e alala i Aukilani.

O le aso ananafi na maua ai le avanoa mo tamaitai uma e toalima e faatalanoa ai i luga o le Radio Samoa, e le tamaitai o Janine Tuivaiti, o ia foi sa avea ma Tausala o Samoa & Tausala o Atu Motu o le Pasefika i le tausaga 2012 – 2013.

Sa taufai lava saunia tamaitai uma ia latou tali i fesili sa fesiligia ai e Janine, ma o le tele o latou manatu sa taulai lava i le naunau e uunaia pea le aganuu a Samoa aemaise ia maua e tamaitai talavou uma o le atunuu le uiga mautinoa ma le naunau e tauivi ia ausia moemitiga o se tamaitai Samoa, e na te faalauiloa atu lona atunuu ma ana tu ma aganuu faa-Samoa.

O le afiafi nei la lea o le a sagai atu ai loa i latou uma nei o tamaitai tauva e toalima, e faaatoatoa a latou tapenaga uma a o silasila le vasega o faamasino ma faia la latou filifiliga mo le tamaitai ua onomea ma agavaa e tauave le pale mo lenei tausaga o le Tausala poo le Miss Samoa NZ 2023.

O i latou e toalima o le a tauva:

Finalist #1 – Kayla Fatima Schwalger – Aukilani

Finalist #2 – Seira Janet Silivia Ale Palelei – Kalaiesetete

Finalist #3 – Annastasia Maletina Tarako – Aukilani

Finalisi #4 – Cherish Faamanū Manaia – Kalaiesetete

Finalist #5 – Karasa Foai Fuga – Aukilani

O le nofoaga o le a faia ai le sailiga o se Miss Samoa NZ o le Church Unlimited Auditorium 1 i le tuatusi o le 3 Te Atatu Rd i Glendene.