I le faamasinoga sili lava, e fā tausaga ua nofosala ai i le falepuipui ia Benjamin Faafetai Vaafusuaga o Fugalei ma Faga i Savaii, ina ua faamaonia lona moliaga o le ave taavale faatamala na mafua ai ona maliu Nili Faauma o Fugalei ma Sataoa.
O Aokuso o le tausaga e 2021 i le auala o Vaea Street na tupu ai se faalavelave tau taavale na aafia ai le soifua o lē ua maliu sa malaga faatasi ma lē ua molia sa aveina le taavale.
Na ioe Benjamin i le moliaga a leoleo, ae o le Aso Tofi na tea nei na faatoa lau ai le faasalaga a le faamasinoga.
O suesuega a leoleo o loo faamauina ai o lē ua molia ma lē ua maliu sa tafafao i le nofoaga o le Marina i Matautu tai i Apia ma sa tele le avamalosi na la tagofia.
O le la tuua o le nofoaga na agai ai le la taavale ma uia le auala o Vaea Street ma tupu ai le faalavelave ina ua oso le taavale i tua ma le auala.
Na taumafai i latou na iai i le faalavelave e faanatinati ona ave i le falemai i laua na manun’ua, peitai e taunuu lē ua fano le soifua i le falemai i Motootua ua maliu ona o le tuga o ona manu’a.
