Ua oo atu I le 388 afe tui ua maea ona faia I le atunuu ma le 120 afe oi latou ua maea ona faia tui uma e lua. O le lipoti aupito I lata mai o le faamai ua faailoa ai e le faatonu aoao o le soifua maloloina Dr Ashley Bloomfield, e tasi le case ua faamaonia mai I nofoaga faanofoesea I le aso ae leai se case mai le komiuniti.
Fai mai Bloomfield o le iloiloga o loo faia nei ile soifua maloloina lautele o tagata I NiU Sila mai le case ua faamauina mai Melepone I Ausetalia, e itiiti ma ua fautuaina foi le faaauau pea o faigamalaga e aunoa ma se faanofoesea ile va o atunuu e lua.
Fai mai le minisita Chris Hipkins I leisi lua vaiaso o lumanai e tatau ai loa ona taunuu Niu Sila I le aofaiga e afa miliona pe a sologa lelei pea le faiga o tui o loo faasolo. Faafetaia e le minisita le aufiagaluega I le atunuu atoa ona o galuega faatino aemaise o le system o loo faaaogaina.
Ua faia mai lenei lipoti ao vevela ai foi nisi o finagalo faaalia ma faamatalaga agai I se tasi o nofoaga e faia ai tui o le koviti I Aukilani ma lona faagasologa. Fai mai le herald o leisi nofoaga sa le taliaina ai se tina matua 81 tausaga ina ua tapunia le tumau lea nofoaga ona o le le lava o avanoa.
