O lea ua faalauiloa mai e le faiaoga o le Manu Samoa 15, Vaovasamanaia Seilala Mapusua, le lisi o lana ‘au o le a tapenapena atu mo le Taamilosaga o le Ipu a le Lalolagi o le a faia i Falani i lenei tausaga mai le aso 8 o Setema e oo i le aso 28 o Oketopa 2023.

Ma ua aofia mai lenei ‘au nisi o suafa o alii sa iloga foi lo latou tulai mai a o taaalo ai i le All Blacks a Niu Sila ma le Wallabies a Ausetalia, ae o lea ua sii aao nei e fia taaalo mo le ‘au a le atunuu o o latou tupuaga, le Manu Samoa.

O Charlie Faumuina, Steven Luatua ma Lima Sopoaga, o nisi ia o alo o Samoa sa muai taaalo mo le All Blacks, ae o lea ua sauni nei e ofu le jersey lanumoana a le Manu Samoa mo le Ipu a le Lalolagi.

O le alii o Charlie Faumuina e 50 ana taaloga na taalo ai mo le All Blacks ma na taalo foi o ia i le ‘au a Niu Sila lea na manumalo i le Ipu o le Lalolagi i le taamilosaga o le 2015.

Mo Luatua ma Sopoaga, na oo foi le la taaalo i le ta’i 15 ma 18 taaloga na taaalo ai mo le All Blacks.

O le alii o Christian Lealiifano sa taalo i le tulaga o le first five mo le ‘au tele a Ausetalia, le Wallabies ae o lea foi ua sii lona lima e fia taalo mo le Manu Samoa.

O le alii o Tim Nanai Williams o se tasi foi tama taalo malosi i taamilosaga o le Super Rugby ma sa taalo foi mo le ‘au taitoafitu a Niu Sila.

O le suiga ua mafai ai ona taaalo nei alo o Samoa mo le ‘au a le atunuu, ina ua suia i le 2021 le tulafono mo le agavaa o alii e taaalo mo atunuu o latou tupuaga e ese mai ‘au o loo taaalo ai i atunuu o aumau ai, pe a mautinoa faamaoniga o le atunuu lea na latou soifua mai ai, poo le atunuu na soifua mai ai o latou mātua poo mātua o mātua.

O se tala fiafia mo Samoa, i le auai atu o nei alo o le atunuu e taaalo mo le ‘au a o latou tupuaga, le Manu Samoa