Na siisii felafolafoaiga i le Palemene i le aso ananafi ina ua tali fuaitau le Minisita o Fesootaiga le Afioga Toelupe Poumulinuku Onesemo i nisi o fesili na tuuina atu e faipule o le maota i le lipoti a le Matagaluega aemaise lava la i le mataupu o le laina o fesootaiga le marine cable.
O le itu sa faatāua i le saunoaga a le Alii Minisita o le tulaga i le auaunaga a le malo mo ona tagata e ala i le itu tau fesootaiga ma ta’ua ai le taumafaiga a le malo ia totogi lava le initaneti i aoga ia maua uma e tamaiti le tāua o tekonolosi faaonaponei mo aoaoga.
Sa ia ta’ua pau lava le tulaga ia aua ne’i alu alu motusia o le popolega lea o le faigamalo ona ua tilotilo i le tulaga faapisinisi ae ua lē tilotilo le malo talu ai i le tulaga o lana auaunaga mo le atunuu o i latou ia e faaaogāina ia mautinoa la e gafatia tau.
Sa faauilavea le suifaipule mai Faleata 3 ma ia faapea mai e lē mafai ona tupu se mea faapea e pei ona ta’ua e alualu lava tape.
Sa faapea mai le alii faipule o Faleata 3 o le malo o Samoa o loo maualuga ona sea o loo ia umia i le faapisinisiina o le cable e pei ona iai le NPF, SLAC ma le UTOS ma e lata i le 70 pasene ona sea, atoa ai ma kamupani telefoni e lua le Digicel ma le Vodafone.
Na saunoa Toelupe o le tulaga lea e pei ona iai saunoaga a le Taitai o le Itu Agai i nisi o fonotaga ua mavae ia faapisinisi, peitai o le faigamalo fou, ia alofa i tagata.
O se tulaga e lei talia gofie e le Itu Agai i lona taitai ma le failautusi o le HRPP.
O le faamalamalaga a le Minisita o Faatoaga ma Faigafaiva na ta’ua ai o le tulaga o loo finau ai pe aisea e taugata ai le initaneti.
Ma ia ta’ua ai na fai e le faigamalo talu ai le cable ona tuuina atu lea e faatutoatasi ae o le tulaga sa tatau ona iai sa tatau ona faatino lava e le malo.
Na ia ta’ua foi o le tala i na taimi e lē mafai e le malo ona faatino ona tuuina atu loa lea i kamupani telefoni e lua ma isi faalapotoptoga a le Malo, o le ala lea e taugata ai ona e pule lava ia kamupani ia latou tau.
O se tulaga na matuā vevesi ai le Taitai o le Itu Agai ma le failautusi a le HRPP ma minisita o le Kapeneta.
E ui le lafo sa faatulai e Valasi e aveesea ai le faipule o le HRPP ia Lealailepule Rimoni Aiafi mai le maota peitai sa tulai le Tamaitai Palemia ma ia tatalo ina ia fefaamagaloai mai upu ua siisii e lē faigofie na toe faafoi ae alo e faatino le galuega ma a sosolo lelei lava i le tali a le Minisita ina ia mafai ona malamalama sui faipule i faiga faavae ma suiga laiti o loo faatulai mai.
