E iai le lape i le auaunaga a se totino o le malo i le siiga gasegase a le Palemia i le lē logoina lea o le ofisa o le malo o Niu Sila o loo i Samoa.
O le finagalo lea o le Sui Palemia le afioga Toelupe Maoiautele Poumulinuku Onesemo, ina ua fesiligia i le feiloa’iga ma tusitala i le Aso Faraile ua mavae, e māfua ona o nisi o lipoti sa faailoa ai feiloa’iga a le ta’ita’i o le malo ma nisi o sui o le malo o Niu Sila faapea le sui o le malo o Isaraelu, e aunoa ma se ofisa sinia o le Matāgaluega o le Va i Fafo a lo tatou malo.
E le’i finagalo le Sui Palemia e faailoa poo ai tonu le ofisa o le malo o Samoa na māfua ai le lape, ae na ia faailoa i tusitala e aogā mea e tutupu mo le lumana’i.
O feiloa’iga a le Palemia o le atunuu ma sui o ia malo sa faia i le ofisa o le Konesula o Samoa i Aukilani sa auai ma le Konesula o le tatou malo ma le Komesina o Fefaataua’iga a Samoa i Niu Sila.
Sa feiloa’i foi le Palemia o Niu Sila ma le Palemia o Samoa i le ofisa o le Konesula o le tatou malo i Aukilani lava i le vaiaso ua mavae.
