O nisi o measina a lo tatou atunuu e pei o siapo, ma ietoga faapea ivi poo human remains, o nisi o tamalii ua leva ona maliliu o loo teu i le fale mataaga o le Natural History i le setete o Utah i Amerika, ua lipotia e le nusipepa o le Sunday Samoan o le a toe faafoi mai i lo tatou atunuu.
Ua faailoa e le nusipepa se tusi a le Minisita o Aoga Taaloga ma Aganuu, ua ave i le pulega o le nofoaga o aoaoga o tala tuu ma tala faasolopito faapea a tatou aganuu ma le gagana Samoa i le Iunivesite Aoao o Samoa, ua faailoa iai le ioega a le Malo e toe aumai ia measina ma vaega tāua o le tatou tala faasolopito.
Ua faailoa lea ioega i le tuanai o se aoaoga sa faia i le Iunivesite a le atunuu i le vaiaso na tea nei, sa faailoa ai nisi o ia measina ma faamatala ai foi o latou talaaga ma le mafuaaga o le oo i Amerika.
O le fale mataaga o loo i lotoa i Malifa o loo teu ai nisi o measina a Samoa, ma o loo iai foi ma ata ma nisi o faamaumauga o le talafaasolopito o pulega faakolone, ma le taimi o le fetuatuanai o sailiga o malo a Samoa.
