Ua faailoa lautele mai e le ofisa tutotonu o galuega fai a le Malo o Fiti, le taunuu atu o le feau faamalo ma faamanuia a le taitai o le Malo o Samoa le afioga i le tamaitai Palemia, Fiame Naomi Mataafa, ua momoli atu ai moomooga lelei o le Palemia o le tatou atunuu, i le tulai mai o le Palemia filifilia o lea Malo tuaoi le susuga Sitiveni Rabuka, i le mae’a o le faigapalota a Fiti i le faaiuga o le vaiaso na tea nei.
Faaalia e le tamaitai Palemia e iai lona faamoemoe maualuga o le a galulue faatasi le Palemia filifilia ma lana faigamalo soofaatasi, ma le pulegamalo a Samoa i le siitia o soo se galuega o le atiina a’e o le tamaoaiga mo le manuia o tagata o atunuu e lua.
“O lou filifilia e avea ma taitai o le faigamalo soofaatasi, o le faatuatuaga lea o ou tagata i le mae’a o le latou faiga filifiliga”, o le tasi lea o finagalo o le afioga Fiame Naomi Mataafa i lana feau faamanuia i le Palemia filifilia o Fiti, ua avea ai ma sui o le Malo ma tagatanuu uma o Samoa.
E lua paeaiga sosoo tai fa tausaga a le Palemene o Fiti o tulai i le tofi Palemia le susuga Frank Bainimarama ma lana vaega faaupufai o le Fiji First, ae 16 tausaga pe a tuufaatasi ma le valu tausaga o lana pulegamalo o ia tauave le taitaiga o lea Malo i le tuanai o le fouvale na ia taitaia na pulea faamalosi ai e Bainimarama, o se tasi o taitai o le fitafita a Fiti le pulega o lo latou Malo a o avea Laisenia Qarase ma Palemia o Fiti.
O le Palemia filifilia ia Sitiveni Rabuka, sa ia taitai foi i le fouvale muamua a le fitaita na faoa faamalosi ai foi pulegamalo faatemokarasi a lea atunuu i ni tausaga ua tuanai.
