O loo suesueina e leoleo se faalavelave tau taavale i le taeao o le Aso Toonai na tea nei i Salelologa i Savaii na maliu ai se tamā i le faamatalaga mai le sui Komesina o leoleo le susuga Papalii Monalisa Tiai Keti, na oso ai le taavale a se tina 32 tausaga a o taumafai e faasolomuli lana taavale.
E le o atoatoa ona tuuina mai e leoleo faamatalaga tonu o le faalavelave ona e lei mae’a suesuega, ae o le tina ua tuuaia, ua molia i le ave taavale faatamala ua mafua ai ona oo le maliu i se tagata.
O se isi mataupu o loo suesue e leoleo i le taimi nei, o le maliu o se tina 49 tausaga le matua o loo iai masalomiaga o se gaioiga solitulafono e fesootai i le fano o lona soifua.
O ona foliga e pei ona faailoa e le sui komesina e totolia ma lona auvae o loo iai foi se aafiaga ma ua masalomia o se faaoolima e mafua ai lea tulaga.
O le faalavelave na tupu i Fasitoouta i le aiga o le toalua o le tina ua maliu. O le faaiuga o le vaiaso nei e faia ai se taotoga faapitoa e faamautu ai le maliu o lea tina, faapea foi le tamā na maliu i le faalavelave tau taavale i Salelologa i Savaii.
